ABŞ-də aparılan yeni araşdırma uşaqların göz hərəkətlərinin depressiya riskinin erkən göstəricisi ola biləcəyini ortaya qoyub.
Binqhemton Universitetinin alimləri uşaqların müxtəlif emosional üz ifadələrinə necə reaksiya verdiklərini araşdırıblar.
Məlum olub ki, uşaqların üzlərdəki emosiyalara diqqət yetirmə xüsusiyyətləri depressiya riskindən xəbər verə bilər. Bu əlaqə isə ailədə psixi pozuntuların olub-olmamasından asılıdır.
Tədqiqatda 242 uşaq və onların anaları iştirak edib. Alimlər iki il ərzində hər altı aydan bir uşaqların sevinc, kədər, qəzəb və neytral ifadəli üz şəkillərinə reaksiyalarını izləyiblər. Bunun üçün uşaqların baxış istiqamətini və göz hərəkətlərini qeydə alan xüsusi texnologiyadan istifadə olunub.
Nəticələr göstərib ki, anaları ağır depressiv pozuntulardan əziyyət çəkən uşaqlarda depressiya əlamətlərinin artması kədərli üz ifadələrinə daha çox diqqət yetirmə ilə əlaqəlidir.
Belə uşaqlar mənfi emosional siqnallara daha çox köklənir və diqqətlərini başqa istiqamətə yönəltməkdə çətinlik çəkirlər. Ailəsində depressiya tarixçəsi olmayan uşaqlarda isə fərqli mənzərə müşahidə edilib. Onlarda depressiya əlamətləri artdıqca xoşbəxt üz ifadələrinə diqqət azalır. Alimlər bunu müsbət emosiyalara həssaslığın zəifləməsi ilə əlaqələndirirlər. Tədqiqatçılar bildiriblər ki, bu xüsusiyyətlər inkişafın erkən mərhələlərində formalaşa və gələcək psixi sağlamlığa təsir göstərə bilər.
Onların əsas məqsədi depressiyanın klinik mərhələyə çatmasından əvvəl riskin müəyyənləşdirilməsinə kömək edəcək davranış göstəricilərini aşkar etməkdir.
Araşdırma iştirakçılarının müşahidəsi hazırda da davam edir. Alimlər bu diqqət modellərinin yeniyetməlik dövründə qorunub-qorunmadığını və gələcəkdə depressiya riskinə təsirini müəyyənləşdirməyə çalışırlar.
Mənbə: bizim.media
scorpion.az