Siqaret çəkmək illərdir dünya səhiyyə təşkilatlarının əsas diqqət mərkəzində olan təhlükəli vərdişlərdən biridir. Müasir dövrdə elmi araşdırmalar bu zərərli vərdişin insan orqanizminə vurduğu fəsadları açıq şəkildə ortaya qoyur. Hər il dünyada milyonlarla insan məhz siqaretə bağlı xəstəliklər səbəbilə həyatını itirir.
Tütün tüstüsünün tərkibində 7 mindən çox kimyəvi maddə mövcuddur ki, bunlardan ən azı 70-i xərçəngə səbəb olan maddələrdir.
Siqaret yalnız ağciyərlərə deyil, ürək-damar sistemi, beyin, qaraciyər, dərialtı toxumalar və reproduktiv orqanlara da ciddi təsir göstərir.
Ən çox rast gəlinən xəstəliklər:
Ağciyər xərçəngi: Siqaret çəkənlərdə bu xəstəlik riski 25 dəfə artır.
Xroniki bronxit və emfizema: Tənəffüs yollarının daimi zədələnməsi ilə nəfəs alma çətinləşir.
İnsult və infarkt: Nikotin və karbonmonoksid damarların daralmasına və qanın laxtalanmasına səbəb olur.
İmmunitet zəifləməsi: Siqaret çəkən şəxslər infeksiyalara daha tez yoluxur.
Pasiv siqaret çəkmək də təhlükəlidir
Siqaret çəkməyən, lakin siqaret tüstüsünə məruz qalan insanlar – xüsusilə uşaqlar və yaşlılar – ciddi sağlamlıq problemləri ilə üz-üzə qalırlar. Araşdırmalar göstərir ki, pasiv siqaret tüstüsü də xərçəng, allergiya və astma kimi xəstəliklərin yaranmasına səbəb ola bilər.
Təhlükədən qurtulmaq mümkündür
Siqareti tərgitmək sağlamlığa ikinci bir şans qazandırır. Siqareti buraxdıqdan 20 dəqiqə sonra qan təzyiqi və nəbz normallaşır, 24 saat ərzində infarkt riski azalır, 1 il sonra isə ürək xəstəlikləri riski yarıbayarı azalır. Bununla yanaşı, dad və qoxu hissləri bərpa olunur, bədən enerjisi artır.
Azərbaycan səhiyyəsi də xəbərdarlıq edir
Səhiyyə Nazirliyi və digər aidiyyəti qurumlar siqaretin zərərlərinə dair maarifləndirici tədbirlər həyata keçirir. 2024-cü ildən etibarən bəzi ictimai yerlərdə siqaret çəkməyə qoyulan məhdudiyyətlər gücləndirilib.
Mənbə: bizim.media
scorpion.az