Beynəlxalq İqtisadiyyat və Sülh İnstitutu (IEP) tərəfindən hazırlanan 2026-cı il üzrə Qlobal Sülh İndeksi dünyanın ən təhlükəsiz və sabit ölkələrini müəyyənləşdirib.
Xarici mediaya istinadla xəbər verilir ki, araşdırma çərçivəsində 163 ölkə 23 müxtəlif göstərici üzrə qiymətləndirilib.
Qiymətləndirməyə daxili və beynəlxalq münaqişələrin səviyyəsi, ictimai təhlükəsizlik, hərbiləşmə dərəcəsi və terrorizmin təsiri kimi amillər daxil edilib.
Hesabata görə, qlobal miqyasda sülh səviyyəsində azalma müşahidə olunsa da, bəzi ölkələr sabitlik və təhlükəsizlik baxımından lider mövqelərini qoruyub saxlaya biliblər.
2026-cı ilin ən təhlükəsiz 10 ölkəsi
1. İslandiya
İslandiya artıq 17-ci ildir ki, dünyanın ən təhlükəsiz ölkəsi statusunu qoruyur. Aşağı cinayət səviyyəsi, güclü dövlət institutları və cəmiyyət daxilində yüksək etimad bu nəticənin əsas səbəbləri hesab olunur.
2. İrlandiya
Effektiv demokratik institutları, neytral xarici siyasəti və aşağı həbs göstəriciləri sayəsində İrlandiya ikinci pillədə qərarlaşıb.
3. Yeni Zelandiya
Ölkə reytinqdə iki pillə irəliləyərək Asiya-Sakit Okean regionunun ən sülhpərvər dövləti olub.
4. Avstriya
Siyasi sabitliyi və Avropanın mərkəzində yerləşməsi Avstriyanın ən təhlükəsiz ölkələr sırasında qalmasına imkan verib.
5. İsveçrə
Siyasi sabitlik, zorakı cinayətlərin aşağı səviyyəsi və beynəlxalq münaqişələrdə minimal iştirak İsveçrənin ilk beşlikdə yer almasını təmin edib.
6. Sinqapur
Cənub-Şərqi Asiyanın ən təhlükəsiz ölkəsi hesab olunan Sinqapur ictimai təhlükəsizlik və sabitlik göstəricilərində yüksək nəticələr nümayiş etdirib.
7. Portuqaliya
Sosial inkişafa yatırımlar və cinayətkarlıqla bağlı narahatlıqların azalması Portuqaliyanın ilk onluqdakı mövqeyini möhkəmləndirib.
8. Danimarka
Yüksək həyat keyfiyyəti və təhlükəsizlik səviyyəsi ilə Danimarka ən etibarlı ölkələrdən biri olaraq qalır.
9. Sloveniya
Uzunmüddətli regional sabitlik və səmərəli dövlət idarəçiliyi Sloveniyanın reytinqdə yüksək yer tutmasına şərait yaradıb.
10. Finlandiya
Şimali Avropadakı mürəkkəb geosiyasi vəziyyətə baxmayaraq, Finlandiya təhlükəsizlik göstəricilərini yaxşılaşdıraraq ilk onluğa qayıtmağı bacarıb.
Mənbə: lent.az
scorpion.az