İngiltərə millisinin keçmiş hücumçusu Endi Kerrol özünün “Owning It” adlı avtobioqrafiyasında Fabio Kapellonun rəhbərliyi altında çalışdığı dövrlə bağlı xatirələrini bölüşüb.
37 yaşlı keçmiş hücumçu milli komandaya çağırıldığı müddətdə bir neçə gözlənilməz və absurd münaqişə ilə üzləşdiyi italyan məşqçinin metodlarını tənqid edib.
Kerrol milli komandanın təlim-məşq toplanışında mobil telefonla bağlı baş verən hadisəni xatırlayıb. Oyunçu komandanın toplanışına 15 dəqiqə tez gəlsə də, Kapello onu cihazla görəndə əsəbiləşib.
“Fabio Kapello bir az dəlisov idi. Yerdə oturub telefonuma baxırdım, Kapello içəri girdi, yaxınlaşdı və onu əlimdən aldı. “Biz burada işləməyə çalışırıq!” deyə qışqırdı. “Telefondan istifadə etməklə hörmətsizlik edirsən! Mənə mesaj göndər!” Və bunu deyib telefonu sinəmə atdı”.
O, epizodun onu tamamilə çaşqınlığa saldığını və milli komanda yoldaşı Eşli Koulun qorxaraq smartfonunu köynəyinin altında gizlətdiyini bildirib.
Daha qəribəsi isə Kapellonun hücumçunu meydandan kənar nüfuzuna və gərgin şəxsi həyatı ilə bağlı şayiələrə görə danlaması olub.
“Kapellonun ofisinə girib onunla görüşən kimi məni lağa qoymağa başladı. “Sən daim mediada içki içib yaşlı qadınlarla cinsi əlaqədə olduğun üçün adın hallanır, dayanmalısan” dedi. “Nə?” deyə soruşdum. “Mən bunu etməmişəm” dedim.
Düşünürdüm ki, bu adam nədən danışır? Ona kim deyib ki, mən yaşlı qadınlarla yatıram? O, məni komanda yoldaşlarımdan biri ilə səhv salıb? Sonda sadəcə razılaşmalı oldum: “Bəli, yaxşı, bu bir daha təkrarlanmayacaq”, – Kerrol bildirib.
Mənbə: publika.az
scorpion.az