İtaliya Seutada yaranmış miqrasiya böhranı ilə əlaqədar İspaniya ilə Şengen sazişinin tətbiqini müvəqqəti dayandırıb.
Bu barədə ölkənin Baş naziri Corcia Meloni məlumat verib.
"Hökumət İspaniya ilə dəniz və hava yolu üzrə sərbəst hərəkəti nəzərdə tutan Şengen rejiminin tətbiqini müvəqqəti dayandırmaq və sərhəd nəzarətini yenidən tətbiq etmək qərarı qəbul edib", – deyə hökumət başçısı X sosial şəbəkəsində yazıb.
Meloninin sözlərinə görə, bu tədbir zəruri olduğu müddətdə qüvvədə qalacaq, lakin "yay turizm axınına hər hansı mənfi təsirin qarşısını almaq üçün maksimum səy göstəriləcək". Baş nazir həmçinin bildirib ki, İtaliya İspaniya hakimiyyətinə Avropa İttifaqının sərhədlərinə tam nəzarətin təmin edilməsi və böhranın aradan qaldırılması məqsədilə irəli sürüləcək istənilən Avropa təşəbbüsünü dəstəkləməyə hazırdır.
İtaliya artıq qərarı barədə Avropa Komissiyasını məlumatlandırıb. Qərarın qüvvədə olma müddəti 30 gündür.
İtaliya Şengen rejiminin tətbiqini ilk dəfə dayandırmır. Daha əvvəl Sloveniya ilə sərhəddə də qanunsuz miqrasiyanın artması ilə əlaqədar sərhəd nəzarəti müvəqqəti bərpa edilmişdi. Corcia Meloninin rəhbərlik etdiyi hökumət qeyri-qanuni miqrasiya ilə mübarizəni əsas prioritetlərindən biri elan edib.
İyulun 30-da minlərlə miqrant üzərək, həmçinin şəhəri Mərakeşdən ayıran dalğaqıranı piyada keçərək Seutaya daxil olmağa nail olub. Şəhər hakimiyyəti təxminən 60 min miqrantın gəldiyini bildirib. Yerli KİV-in məlumatına görə, İspaniyanın Daxili İşlər Nazirliyi 50 min nəfərin şəhərə çatdığını, onlardan təxminən 37,5 mininin isə Mərakeşə geri qaytarıldığını açıqlayıb. Son məlumatlara əsasən, şəhərə çatmağa cəhd edərkən azı 57 nəfər həlak olub. Baş verən hadisələr fonunda bir sıra Avropa ölkələri İspaniyanın Şengen zonasındakı üzvlüyünün dayandırılması məsələsinə baxılmasına çağırıb.
Mənbə: az.trend.az
scorpion.az