Rusiya Təhlükəsizlik Şurasının sədr müavini Dmitri Medvedyev ABŞ-ın Rusiyaya qarşı sanksiyalarını Fridrix Nitsşenin məşhur fikri ilə şərh edib.
Medvedyev buna ABŞ prezidenti Donald Trampın Vaşinqtonun Moskva ilə Ukrayna məsələsində fəal danışıqlar apardığı üçün hələlik yeni sanksiyalar tətbiq etməyəcəyi barədə açıqlamasından sonra münasibət bildirib.
Medvedyev “Maks” sosial şəbəkəsindəki paylaşımında bildirib ki, ABŞ Konqresində bu qərara görə Trampı tənqid edənlər olsa da, sanksiyaların təxirə salınmasını alqışlayanlar da var. Medvedyev bunu, xüsusilə respublikaçıları çətin seçkilərin gözlədiyi bir vaxtda, müəyyən cəsarət kimi qiymətləndirib.
Rusiya rəsmisi Trampı praqmatik şəxs adlandırıb. Onun fikrincə, ABŞ lideri strateq kimi o qədər də güclü olmasa da, biznes duyumu yaxşıdır. Medvedyev Rusiya ilə mümkün “dizel sazişi”nin və digər addımların Trampa müəyyən dividendlər gətirə biləcəyini bildirib.
Bununla belə, Medvedyev ABŞ-ın sanksiyalar siyasətinin mahiyyətinin dəyişmədiyini vurğulayıb:
“Mənəvi cəhətdən bu qanun və amerikalıların güzəştləri vecimə deyil. Sanksiyalara gəlincə isə, qoca Nitsşenin dediyi kimi: "Məni öldürməyən, məni gücləndirir”.
Mənbə: publika.az
scorpion.az