Azərbaycan minatəmizləmə fəaliyyətlərini milli sosial-iqtisadi prioritet kimi qəbul edir.
Bunu Birləşmiş Millətlər Təşkilatının Azərbaycandakı rezident əlaqələndiricisinin adından çıxış edən Nasar Hayat IV Beynəlxalq Mina Fəaliyyəti Konfransının açılışında deyib.
“2026-2030-cu illər üçün Birləşmiş Millətlər Təşkilatı və Azərbaycan hökuməti arasında Dayanıqlı İnkişaf üzrə Əməkdaşlığa dair Çərçivə Sənədi əsasında biz ANAMA-nı dəstəkləməyə sadiqik. Hələ çox iş görülməlidir və daha böyük tərəfdaşlıq və beynəlxalq həmrəylik lazımdır. Mina çirklənməsi milli bir problem ola bilər, lakin minatəmizləmə fəaliyyəti qlobal bir məsuliyyətdir: bir ölkədə inkişaf etdirilən təcrübə, texnologiya və dərslər bir çoxlarına fayda verə bilər”, - BMT nümayəndəsi vurğulayıb.
O qeyd edib ki, problemlərin miqyasına baxmayaraq, Azərbaycan mühüm irəliləyiş əldə edib. BMT-nin İnkişaf Proqramının rəhbərliyi ilə çirklənmiş ərazilərin əhəmiyyətli hissəsi tədqiq edilib və minalardan təmizlənib. Bu günə qədər təxmin edilən çirklənmiş ərazilərin 25,6 faizi təhlükəsiz istifadə üçün istifadəyə verilib.
“Landmine Monitorin 2025-in məlumatına görə, Azərbaycan təkcə 2024-cü ildə milli mina fəaliyyətlərinə 146 milyon ABŞ dolları vəsait ayırıb. Bu, dünya üzrə qeydə alınmış ən yüksək milli maliyyə töhfəsidir. 2020-ci ilin noyabr ayından etibarən hökumət fondundan 566 milyon ABŞ dolları vəsait ayrılıb. Bu, mühüm nailiyyətdir. Bu, Azərbaycanın minatəmizləmə fəaliyyətlərini milli sosial-iqtisadi prioritet kimi qəbul etdiyini nümayiş etdirir”, - BMT təmsilçisi vurğulayıb.
Mənbə: apa.az
scorpion.az