İspaniyalı ulduz futbolçu Mark Kukurelya illərdir xarakterik buruq saçları ilə futbol dünyasının ən çox tanınan simalarından biridir.

"Qafqazinfo.az"a istinadla xəbər verilir ki, azarkeşlər Mark Kukurelyanı meydanda qorxmaz, enerjili və emosional futbolçu kimi tanıyırlar.

Lakin İspaniya millisinin müdafiəçisinin həyatının ən böyük mübarizəsi futbol meydanında deyil, ailəsi ilə bağlıdır.

Kukurelya və həyat yoldaşı Klaudiya Rodriqes yeniyetməlik illərindən birlikdədirlər. Cütlüyün üç övladı var: Mateo (2019), Rio (2021) və Bella (2022).

Onlar sosial mediada tez-tez ailə həyatından xoş anlar paylaşırlar. Lakin bu xoşbəxt görüntülərin arxasında uzun və çətin bir sınaq dayanır.

Kukurelya və Klaudiya böyük oğulları Mateonun digər uşaqlardan fərqli inkişaf etdiyini erkən yaşlarda hiss ediblər.

Əvvəlcə onlar bunun sadəcə fərdi inkişaf tempi olduğunu düşünüblər. Lakin zaman keçdikcə Mateonun davranışlarında və ünsiyyətində fərqlər daha aydın görünməyə başlayıb.

Aparılan müayinələrdən sonra ailəyə Mateonun autizm spektr pozuntusu olduğu bildirilib.

Bu xəbər valideynlər üçün böyük sarsıntı olub. Onlar yalnız emosional çətinliklərlə deyil, eyni zamanda, oğulları üçün uyğun təhsil, terapiya və dəstək imkanları tapmaq kimi mürəkkəb proseslə də üzləşiblər.

Kukurelya və Klaudiya Mateonun öz potensialına çatması üçün müxtəlif mütəxəssislərlə görüşüb, fərqli terapiya üsullarını araşdırıb və autizm haqqında daha çox öyrənməyə başlayıblar.

Mateonun danışmaması ailə üçün ən böyük çətinliklərdən biri olub. Onun hisslərini, ehtiyaclarını və düşüncələrini anlamaq bəzən valideynləri çətin vəziyyətdə qoyub.

“Amazon Prime”da yayımlanan “Married to the Game” sənədli serialında Kukurelya və Klaudiya bu dövrdən danışarkən duyğularını gizlədə bilməyiblər.

Onlar etiraf ediblər ki, bəzən oğullarının daxili dünyasına daxil ola bilmədikləri üçün özlərini çarəsiz hiss ediblər. Lakin onlar mübarizə aparmaqdan əl çəkməyiblər.

Kukurelya bildirib ki, autizmli uşağa valideynlik ilk növbədə onu dəyişdirməyə çalışmaq deyil, onun dünyasını başa düşməyi öyrənməkdir: “Əsas məsələ onu dəyişmək deyil, anlamaqdır”.

Bu məqsədlə futbolçu autizmlə bağlı kitablar oxuyub, həkimlər və psixoloqlarla məsləhətləşib, həmçinin autizmlə yaşayan insanların təcrübələrindən yararlanıb.

O bildirib ki, məhz həmin insanların məsləhətləri onun baxışını dəyişib. Mateonun fərqli olduğunu qəbul etmək və onun öz dünyasında daha rahat hiss etməsinə kömək etmək əsas məqsədə çevrilib.

Oğlunun vəziyyəti Kukurelyanın həyata və karyeraya baxışını da dəyişib.

Futbolçu üçün artıq ən vacib məsələ yalnız uğurlu karyera və kuboklar deyil. O, hər qərarında ailəsinin rahatlığını və Mateonun ehtiyaclarını nəzərə alır.

Kukurelya bildirib ki, oğlu üçün uyğun məktəb və terapiya imkanları olmayan bir şəhərə və ya komandaya keçməyi heç vaxt düşünməz: “Mən həmişə deyirəm ki, ailə birinci yerdədir. Futbol vacibdir, amma ailə daha da vacibdir”.

Bu səbəbdən o və həyat yoldaşı hər hansı karyera qərarı zamanı ilk olaraq yaşayış şəraitini, təhsil imkanlarını və dəstək xidmətlərini qiymətləndirirlər.

Meydandakı enerjisi, mübarizliyi və fərqli görünüşü ilə diqqət çəkən ispan müdafiəçi uzun müddət saçlarına görə tənqidlərin və zarafatların hədəfi olub.

Lakin onun bu görünüşünün arxasında şəxsi seçimdən daha böyük və duyğusal bir səbəb dayanır.

Kukurelya bildirib ki, saçlarını məhz autizmli oğlu Mateo üçün uzadır.

Futbolçu etiraf edib ki, onun üçün saçları sadəcə xarici görünüş məsələsi deyil, oğlu ilə arasında xüsusi bağ yaradan bir simvoldur: “Mənim autizmli bir oğlum var. Kaş heç pulum olmayaydı, ama oğlum sağlam olaydı. Saçlarımı ona görə uzadıram ki, o, saçlarımı sevir. Həm də bir anlıq məni unutsa, məni tanıya bilsin...”

Kukurelya futbol karyerasında böyük uğurlar qazanıb. O, İspaniya ilə böyük turnirlərdə iştirak edib, klub səviyyəsində titullar əldə edib. Lakin özü üçün ən böyük uğurun bunlar olmadığını dəfələrlə vurğulayıb.

Futbolçu hesab edir ki, həyatının ən böyük missiyası oğlu Mateonun yanında olmaq, onu anlamaq və dəstəkləməkdir.

Kukurelya və Klaudiya oğullarının vəziyyətini gizlətmək əvəzinə, bu barədə açıq danışaraq, autizm haqqında məlumatlılığın artmasına töhfə verməyə çalışırlar.

Onların əsas mesajı isə sadədir: autizmli uşaqların mərhəmətə deyil, sevgi, səbir və qəbul olunmağa ehtiyacı var.

Mark Kukurelya üçün qazandığı kuboklar bir gün tarixdə qala bilər. Amma Mateo ilə qurduğu bağ onun həyatının ən böyük qələbəsi olaraq qalacaq.

Mənbə: bizim.media