Dünyanın ən çox istifadə edilən axtarış sistemi olan "Google”un 25 yaşı qeyd edilir.
Şirkətin qurucularından biri Sergey Brin əslən rusiyalı mühacirdir. "Google”un digər qurucusu Larri Peyc Sergeylə 1995-ci ildə ABŞ-ın Stanford universitetində tanış olub.
Bu iki gəncin elmi araşdırmalarının əsasını gündən-günə böyüməkdə olan nəhəng internet məkanında lazımi informasiyanın ən qısa və effektiv şəkildə əldə edilməsi üçün tələb olunan axtarış sistemlərinin yazılması təşkil edirdi. 1996-cı ilin yanvarında onlar Backrub adlanan axtarış sistemini proqramlaşdırmağa başlayıblar.
Bu sistem kiçik miqyasda test edildi və onun axtarış probleminə gətirdiyi unikal həllər mütəxəssislərin təqdirini qazanıb. Onlar icad etdikləri yeni texnologiyanı "Google” adlandırıblar. Nəhayət, "Google.com” domeni 1997-ci il sentyabrın 15-də qeydiyyatdan keçərək sentyabrın 27-də fəaliyyətə başlayıb.
Axtarış sorğularından video paylaşımına, e-poçt xidmətlərindən xəritə tətbiqlərinə qədər hər sahədə təsirini göstərən "Google” milyardlarla istifadəçinin gündəlik həyatının ayrılmaz hissəsinə çevrilib.
25 ildir ki, "Google” dünyanı daha çox əlaqəli etmək üçün yeniliklər etməyə davam edir. Bu gün Android əməliyyat sistemi "Google Maps”, "YouTube” və "Gmail” kimi məhsulları ilə həyatımızın ayrılmaz hissəsinə çevrilib. Süni intellekt və data mining sahəsindəki işləri ilə də diqqət çəkən "Google” gələcəyin texnologiyasının formalaşmasında mühüm rol oynayır.
Mənbə: azxeber.com
scorpion.az