Ukrayna Prezident Ofisinin müşaviri Mixail Podolyakın böyük qardaşı Vladimir Podolyak Rusiyanın tərəfində döyüşərkən Zaporojye vilayətində həlak olub.
Bizim.Media xəbər verir ki, bu barədə “Killed in Ukraine” (KIU) layihəsi “Rosstat”ın sızdırılmış məlumatlarına istinadən məlumat yayıb.
Məlumata görə, 59 yaşlı Vladimir Podolyak 2024-cü il mayın 19-da Zaporojye vilayətinin işğal altında olan hissəsində yerləşən Kirillovka qəsəbəsində həyatını itirib.
Sızdırılmış sənəddə onun ölüm səbəbi kimi kəllədaxili travma və “dəqiqləşdirilməmiş hərbi əməliyyatlar nəticəsində yaranan xəsarətlər” göstərilib. Hadisənin digər təfərrüatları açıqlanmayıb.
Qeyd edək ki, 2024-cü ildə Vladimir Podolyakın məzarının fotosu mediada yayımlanmışdı. Lakin həmin vaxt onun ölüm şəraiti məlum deyildi. Məzarın üzərindəki portretdə o, Rusiya polkovniki formasında, iki “İgidliyə görə” ordeni və “Hərbi kəşfiyyatda xidmətə görə” nişanı ilə təsvir olunub.
Mixail Podolyak 2021-ci ildə böyük qardaşının uzun müddətdir “hərbi təqaüdçü” olduğunu bildirmişdi. O, qardaşının ölümü ilə bağlı açıqlama verməyib. Bununla belə, Mixail Podolyak daha əvvəl Vladimirin Rusiya xüsusi xidmət orqanları ilə əlaqələrini etiraf etmişdi.
Mənbə: bizim.media
scorpion.az